Hólmatindur seldur - áhöfn sagt upp

Hólmatindur, ísfisktogari Eskju á Eskifirði, hefur verið seldur og verður afhentur nýjum eigendum í Rússlandi í lok mánaðarins. Sölu skipsins bar brátt að en Hólmatindur hefur verið á söluskrá um nokkra hríð.

Allri áhöfn skipsins hefur verið sagt upp þar sem ekki hefur verið keypt skip í staðinn fyrir Hólmatind. Reynt verður að bjóða áhöfninni pláss á öðrum skipum útgerðarinnar.

Nokkur ótti er meðal starfsmanna frystihúss Eskju um verkefnastöðu fram að áramótum, en öllum starfsmönnum Eskju, alls um 40, hafði áður verið sagt upp frá og með áramótum, vegna niðurskurðar kvótaheimilda. Starfsfólkið hafði reiknað með fullri vinnu fram að áramótum en nú blasir hráefnisskortur við innan tíðar verði ekki brugðist við því með öðrum hætti.