AFL starfsgreinafélag

Til góðra verka!

AFL starfsgreinafélag AFL starfsgreinafélag AFL starfsgreinafélag AFL starfsgreinafélag AFL starfsgreinafélag AFL starfsgreinafélag AFL starfsgreinafélag

Stuðningur frá Þórshöfn

Verkalýðsfélag Þórshafnar mun stöðva löndun úr uppsjávarskipum sem ekki landa að jafnaði á Þórshöfn eftir að verkfall AFLs og Drífanda hefst á mánudag. Þetta kom fram í fréttum útvarps í dag.

Þá var greint frá því að kröfugerð Verkalýðsfélags Þórshafnar vegna bræðslusamninga væri tilbúin en hún yrði ekki gerð opinber fyrr en eftir fund með Samtökum Atvinnulífsins á fimmtudag. Skýrt var frá því að kröfugerðin væri frábrugðin kröfugerð AFLs og Drífanda en kjarasamningar í bræðslum á landinu eru allir nánast eins og byggja á samningi AFLs og Drífanda við SA sem gerður var í febrúar 2008.

Verkfallsverðir frá AFLi munu halda til Þórshafnar aðfaranótt mánudags til að vera félögum sínum þar til halds og trausts verði reynt að landa afla sem öllu jafna hefði farið til löndunar í verksmiðjum á félagssvæðum AFLs og Drífanda þar sem verkfall skellur á um miðnætti - hafi samningar ekki tekist.

Samtök Atvinnulífsins stefndu AFLi og Drífanda fyrir Félagsdóm vegna verkfallsboðunarinnar og var málflutningur fyrir dómnum í dag og mun úrskurðar að vænta seinnipart fimmtudags.

Ennþá er óljóst hvað Verkalýðsfélag Akraness mun aðhafast en þar er fiskimjölsverksmiðja í eigu Granda hf. AFL og Drífandi sendu stjórnum og trúnaðarráðum Verkalýðsfélaganna á Þórshöfn og Akranesi bréf í síðustu viku þar sem farið var fram á að þessi félög boðuðu til atkvæðagreiðslu um samúðarverkföll í fiskimjölsverksmiðjum, enda væri kjarabarátta félagsmanna AFLs og Drífanda í raun kjarabarátta fyrir alla bræðslumenn.

Ekki hafa borist svör við bréfum félaganna.